4. Sýnataka

4. Sýnataka

Sýnataka.

Viðfangsefni: Taka sýni til skoðunar

Aldur: Miðstig

Námsgreinar: Náttúrufræði.

Tími: 15 – 20 mínútur hver sýnataka á vettvangi.

Mynd: Sýnataka

Markmið

Að nemendur

- kynnist smádýrum sem lifa í vatni

- þjálfist í að greina smádýr með aðstoð víðsjár, greiningarlykla og handbóka

- átti sig á einkennum og fjölbreytileika smádýra, og geta teiknað þau

- kynnist flokkunarkerfum lífvera

- átti sig á mikilvægu starfi smádýra fyrir náttúruna í heild.

Stutt verkefnislýsing

Taka á sýni af botni árinnar (leðja nálægt bakka), steini sem er 1-2 metra frá bakka og svifsýni (úr rennandi vatni). Skoða með berum augum og í víðsjá. Teikna og greina smádýr sem finnast.

Kennslugögn

Nemendablöð og kennslubækur um lífríki í fersku vatni. Bursta, skál, sprautuflösku, dollur, fötur og háfa. Víðsjár og tilheyrandi búnaður til smádýraskoðunar.

Framkvæmd / vinna

Forvinna (undirbúningur / kveikja): Kennari ræðir við nemendur, hvort þeir hafi einhvern tíma tekið upp slý úr á, hvort þeir viti hvað það sé og hvort þeir haldi að þar leynist eitthvað líf. Umræður um smádýr í ferskvatni og sýnatöku með háfi. Kynna fyrir nemendum hvernig háfur er gerður (heimavinna).

Lesa um líf í ferskvatni, t.d. kaflann „Lífverur í fersku vatni” í bókinni „Lífríki í fersku vatni" sem Stefán Bergmann endursamdi, klárað heima niður bls.32. Sumt finnst ekki í straumvatni, afhverju?? -Hugleiða.

Á vettvangi: Nemendur fara eftir leiðbeiningum við töku ferskvatnssýna, sjá nánar í verkefnalýsingu um sýnatökur og vinnubók.

Eftirvinna (úrvinnsla / ígrundun): Þegar heim er komið skoða nemendur smádýrin í víðsjám og reyna að teikna þau upp eins nákvæmt og þau geta. Nemendur reyna síðan, með aðstoð kennara, greiningarlykla og handbóka, að átta sig á hvaða smádýr þetta eru.

Gott er að nota greiningalykil námsgagnastofnunar ásamt bókinni Lífríki í fersku vatni. Fyrir kennara er gott að vera búinn að fletta bók Helga Hallgrímssonar (1979); Veröldin í vatninu. Handbók um vatnalíf á Íslandi.

Námsmat

Fylgjast með krökkunum á vettvangi, meta áhuga, vandvirkni og frumlegheit og svo skýrslu og vinnubók í lokin. Meta má háfinn sérstaklega og jafnvel veita verðlaun fyrir frumlegasta háfinn.

Verkefni