Kennaraháskóli Íslands – Grunndeild

Nemendur sem velja kjörsvið í upplýsingatækni hafa tekið tíu einingar á því sviði en nú hefur deildarráð ákveðið að kjörsviðið megi taka til tuttugu eininga og ræðst á næstu dögum hver nákvæm útfærsla verður. Kjörsviðið í breyttri mynd nefnist kjörsvið um upplýsingatækni og miðlun. Nemendur á öðrum kjörsviðum geta valið að taka eitt eða fleiri námskeið af kjörsviðinu.

Á kjörsviði með nýju sniði verður hægt að ljúka um tuttugu einingum þar sem fimmtán einingar eru í umsjón kennara á kjörsviðinu en fimm til sex einingar felast í námskeiðum sem eru þegar kennd á öðrum kjörsviðum og verða boðin í samvinnu við þau. Þar er um að ræða námskeið sem leggja mikla áherslu á upplýsingatækni, til dæmis myndgerð, myndklippingar eða tónsmíðar í tölvum; upplýsingatækni í tungumálakennslu og upplýsingatækni í stærðfræði.

Markmið

Með kennslu á kjörsviðinu er stefnt að því kennaranemar verði sem best í stakk búnir til að hagnýta upplýsingatækni við framkvæmd og skipulag skólastarfs, við nám og kennslu á greinasviðum og við samþættingu námsgreina. Megináhersla er lögð þátt tækninnar og lykilhlutverk í miðlun, námi og skólastarfi. Einnig er hugað að upplýsingatækni, hönnun og nýsköpun sem beinu viðfangsefni og fagsviði í skólastarfi.

Viðfangsefni

Á kjörsviðinu er fjallað um alla meginþætti tölvunotkunar í skólastarfi, keppt að tæknilegri færni og tæknilæsi og stefnt að sem næmustum skilningi á þýðingu upplýsingatækni fyrir nám, kennslu, upplýsingaleit, miðlun, samskipti og samfélag. Sérstakri athygli er beint að áhrifum tækninnar á hlutverk kennara og nemenda, möguleikum kennara til að nýta tæknina í skólastarfi og stuðla að breyttum náms- og kennsluháttum. Litið er til sem flestra greinasviða og þátta skólastarfs og leitast við að tengja umfjöllun um upplýsingatækni og skólastarf fræðilegri umræðu um nám, uppeldi og samfélagsþróun.

Verk- og ferilmappa

Til að tryggja samfellu á milli námskeiða á kjörsviðinu er meðal annars ætlast til að nemendur eigi allir stafræna verk- og ferilmöppu („portfolio“) þar sem þeir safna og birta efni á meðan þeir stunda nám á sviðinu.

Í möppunni fá bæði nemendur og kennarar gott yfirlit yfir þróun í náminu, verk nemenda og áherslur kennara; af henni má ráða margt um ferli náms og afrakstur. Einnig er lagt kapp á að tengja allt nám á sviðinu sem best við vettvangsnám og kennslu í grunnskóla.

Nokkur námskeið og margir kennarar

Fimm kennarar á kjörsviðinu hafa boðið fram fjögur námskeið og nú er gert ráð fyrir að þau verði fimm til sex auk námskeiða sem boðin eru fram í samvinnu við önnur kjörsvið. Margir fleiri koma að kennslu á námskeiðunum. Ýmis valnámskeið og námskeið á öðrum kjörsviðum geta vel fallið að námi á kjörsviðinu og stutt við það. Kennarar á kjörsviðinu eru líka áfram um að eiga sem besta samvinnu við kennara og nemendur á öðrum greinasviðum.

Eftirfarandi tafla sýnir vægi einstakra námskeiða sem eru í boði á kjörsviðinu. Annars vegar eru námskeið taka má til fimmtán eininga þegar um er að ræða aðalkjörsvið, hins vegar eru námskeið í samvinnu við önnur kjörsvið sem taka má til fimm til sex eininga þegar um er að ræða aðalkjörsvið.

Upplýsingar um einstök námskeið verður hægt að lesa hér á slóðinni http://ust.khi.is/kjorsvid innan skamms.
 

Torfi Hjartarson lektor og oddviti kjörsviðs - torfi@khi.is - tók saman þessa síðu og veitir fúslega nánari upplýsingar. Eftirtaldir kennarar annast skipulag kjörsviðsins:

Jón Jónasson lektor - jonj@khi.is
Karl Jeppesen lektor - kjepp@khi.is
Salvör Gissurardóttir lektor - salvor@khi.is
Stefán Jökulsson - stefanjok@khi.is
Torfi Hjartarson lektor - torfi@khi.is

Um skipulagið er meðal annars tekið mið af kennslu upplýsingatækni í kjarna kennaranámsins. Einnig er horft til námsbrautar um tölvu- og upplýsingatækni í framhaldsdeild. Umsjón með henni hefur Sólveig Jakobsdóttir - soljak@khi.is.