Stærðfræði - stærðfræðinemandinn

 20.37.17.H05
21.37.35.H05

Námskeiðslýsing

Á námskeiðinu er fjallað um tiltekna efnisþætti í stærðfræði og hugað að því hvernig nemendur læra stærðfræði – eða hvers vegna þeir gera það ekki. Fengist verður við þætti úr talnafræði, algebru, rúmfræði og líkindafræði. Markmiðið er að kennaranemar auki við þekkingu sína á þessum sviðum til þess að yfirsýn þeirra yfir námsefni grunnskólans verði betri. Þess vegna eru ýmis þeirra hugtaka sem við sögu koma í grunnskóla víkkuð út og um þau fjallað almennar en gert er í grunn- og framhaldsskóla. Þannig er stefnt að því að kennaranemar styrki tök sín á stærðfræðinni og sjái viðfangsefni grunnskólanemenda í víðu samhengi.

Kennaranemar verða hvattir til að leiða hugann að sínu eigin stærðfræðinámi og greina hvers konar markmið þeir setja sér, hvernig þeir skýra góðan árangur og hverju þeir kenna um þegar miður gengur, hvers virði þeir telja það sem þeir læra í stærðfræði, hversu líklegt þeir telja að þeir geti náð góðum árangri í stærðfræði o.s.frv. Leitast verður við að víkka sjóndeildarhring kennaranema varðandi sýn þeirra á stærðfræði, svo að þeir myndi sér skoðun á hvað sé þýðingarmikið í stærðfræðinámi.

Lesefni:

The Heart of Mathematics. An Invitation to Effective Thinking, (THM) eftir Edward B. Burger og Michael Starbird.
Stærðfræði í kennaranámi (Kennaraháskóli Íslands 2001) eftir Friðrik Diego og Kristínu Höllu Jónsdóttur (að hluta til þýtt). Þetta efni verður á vef námskeiðsins.
Aðalnámskrá grunnskóla – stærðfræði (ítarefni)

Nemendur eru hvattir til að nota áhöld eftir því sem við á. Í stofu K–103 í KHÍ. er að finna ýmis gögn og verkefni til stærðfræðikennslu  Nemendum er velkomið að skoða þau, að því tilskildu að ekki sé farið með þau út úr skólanum og þeim sé skilað aftur samdægurs á sama stað. Einnig er ástæða til að benda á ágætt safn bóka og tímarita um stærðfræði og stærðfræðinám á bókasafni KHÍ.

Slóð á gagnvirk verkefni úr kennslubók er http://www.heartofmath.com/first_edition/activities/index.html

Gagnvirk verkefni á WebCT

Gagnvirk verkefni tengd efni kennslubókarinnar verða í WebCT. Kennari mun fylgjast með árangri nemenda þar, einungis til að finna hvaða atriði þurfa frekar skýringa við. Vefur WebCT er:http://www.webct.is:8900/webct/public/home.pl

Námsmat:

Vettvangsverkefni
Hver og einn kennaranemi skal taka tvo til þrjá nemendur á miðstigi grunnskólans tali og spyrja þá út í hvernig þeir hugsa um þau stærðfræðiverkefni sem þeir eru að vinna að og skoðanir þeirra á verkefnunum. Markmiðið er að kynna sér hugsun og viðhorf grunnskólanema um stærðfræði. Verkefni þetta er skylduverkefni, en er ekki metið til einkunnar. Því skal skilað í WebCT ekki síðar en 14. nóvemberSkila þarf áðurnefndu vettvangsverkefni til að geta lokið námskeiðinu, en það er ekki metið til einkunnar. Gert er ráð fyrir að þessu verkefni sé skilað á vef námskeiðsins og/eða með munnlegum skilum í kennslustundum.

Stutt verkefni
Í staðnámi verða lögð fyrir stutt verkefni, 10-15 mínútur, í kennslustundum, alls fimm sinnun á misserinu. (1. verkefni 14. og 15. september, 2. verkefni 28. og 29. september,  3. verkefni 12. og 13. október, 4. verkefni 26. og 27. október, 5. verkefni 16. og 17. nóvember). Gefin er einkunn fyrir hvert verkefni og fjórar hæstu einkunnir af fimm geta gilt sem 20% námsmats, ef meðaltal þessara fjögurra einkunna reynist hærra en lokaprófseinkunn.
Í fjarnámi verður eitt 40 mínútna verkefni mánudaginn 24. október sem vegur 20% námsmats ef sú einkunn reynist hærri en lokaprófseinkunn.

 Lokapróf
Ef einkunn fyrir stutt verkefni er hærra en lokaprófseinkunn, þá vega verkefni 20% en lokapróf 80%. Ef lokaprófseinkunn er hærri en einkunn fyrir verkefni, þá vegur lokaprófseinkunn 100%.

Vægi efnisþátta í lokaprófi

Talnafræði og talnamengi      35%

Rúmfræði                               30%

Algebra                                  20%

Talning og líkur                     15%