sagnfræðingur
dósent í Kennaraháskóla Íslands

Meginhlutverk þessara vefsíðna er að þjóna nemendum mínum í Kennaraháskóla Íslands. Ef aðrir hafa gagn af er það vel. Ég skipulegg kennsluna af jafnaði í afmörkuðum námsþáttum og er hér að finna lýsingu á þeim og sums staðar nokkuð af lesefni eða vísunum í það. Auk þess má sjá markmið og lýsingar nokkurra námskeiða í heild sinni. Um feril minn er hægt að lesa sér til fróðleiks.

Hér fyrir neðan er aðgangur að fræðigreinum, námsefni og fleiru sem ég hef samið ásamt greinargerðum.

Fyrir byrjunarnámskeið í sögu í KHÍ hef ég samið hefti um aðferðir sem er sérsniðið að þessum þörfum. Það kalla ég Inngang að sagnfræði fyrir kennaranema. Ef fleiri hafa gagn af þessu er þeim velkomið að fá efni að láni.  

Námsefnisgerð hefur jafnan heillað mig. Fyrir 8. bekk í grunnskóla samdi ég kennslubókina Í fullorðinna tölu. Ég fékk síðan tilefni til þess að skrifa pistil um tildrög verksins og hugmyndirnar að baki.

Þegar vinnu við gerð aðalnámskránna var að ljúka urðu nokkur blaðaskrif um sögukennslu. Ég hélt þessu til haga, tók þátt í þeim sjálfur og skrifa hér nokkrar skýringar. 

Í nokkur ár hef ég látið nemendur mína í Kennaraháskólanum vinna verkefni með viðtölum um líf í torfbæjum á tuttugustu öld og þessi verkefni hafa birst sem safn á vefnum. Mér þótti þetta svo skemmtilegt að ég gerði sjálfur slíkt verkefni um Múlakot á Síðu sem snýst um lýsingu á bænum sem faðir minn hafði skrifað.

Þrír íslenskir nemendur við Upplýsingatækniháskólann í Kaupmannahöfn - Anna María Bogadóttir, Ásta Olga Magnúsdóttir og Helgi Þorsteinsson - útbjuggu vef um heimildamyndina um Tyrkjaránið. Ég samdi meirihlutann af textanum.

Heimildamyndin Tyrkjaránið er nú til útláns á Námsgagnastofnun. Fyrir þau not bjó ég til kennsluleiðbeiningar.

“Gáðu á netinu” er viðkvæði margra þegar leita þarf upplýsinga, t.d. fyrir ritgerð í grunnskóla. En hvernig á nemandinn að meta það efni sem hann fær þannig í hendurnar? Hér er vefsíða um mat á vefsíðum: Er vefsíðan nógu góð?

Fyrir ráðstefnu um námsefnisgerð bjó ég til töflu þar sem ég alhæfði um áhrifaþætti sögukennslu á 20. öld. Djarflega gert.

Ég var faglegur umsjónarmaður með samfélagsgreinum þegar unnið var að nýrri aðalnámskrá sem kom út 1999. Í miðju verki kom tveggja mánaða tímabil sem var nokkur biðtími og þá þótti mér rétt að nýta þær athuganir sem ég hafði gert og koma þeim í tímaritsgrein. Ég einbeitti mér að sögunni – eðlilega – og sérstaklega að inntaki hennar sem mér fannst hafa verið í aukahlutverki í námskránum 1977 og 1989. Úr þessu varð greinin Inntak sögukennslu sem birtist í tímariti Kennaraháskóla Íslands, Uppeldi og menntun.